Español English Deutch Asturianu Français Nederlands Português

Redolada


La nuesa casa allúgase nel valle de Borines (Piloña), famosu pol so balneariu del s.XIX y les sos agües, na zona de la Comarca de la Sidra asturiana. Atopámonos nún privilexáu espaciu natural como ye’l Paisaxe Protexíu del Puertu Sueve, na cuenca del ríu Sella, arrodiaos polos impresionantes montes de los Parques Naturales de Picos d’Europa, Ponga y Redes.

Tamos a escasos 20-30 minutos de les ríes, playes y cantiles de la mariña oriental asturiana, de Villaviciosa a Llanes y mui cerca del guapu pueblu de Llastres, col so puertu pesqueru.

Na redolada ye posible practicar infinidá d’actividaes d’aire llibre: senderismu, trekking, bicicleta, alpinismu, esguilada, espeleoloxía descenso de cañones, piragüismu, fotografía de naturaleza y subacuática, pesca deportiva, paseos a caballu, golf…

Ensin escaecer la riqueza cultural: antiguos castros celtes, pequeñes ilesies romániques, a un pasu de Cuadonga y de la formosa ciudá d’Uviéu col so Muséu de Belles Artes y les obres cimeres del Arte Asturianu, y tamién de Xixón, col so espectacular Acuariu y Xardín Botánicu; mui cerca de los Museos del Xurásicu, de la Sidra y de la Minería; metanes una rexón na que s’alluguen importantes Cueves con Arte Paleolíticu (dende Tito Bustillo hasta Altamira, yá na vecina Cantabria) y a unos cientos de metros del más importante xacimientu Neanderthal de la Península Ibérica, la Cueva’l Sidrón; prósimes tamién mos queden les formoses poblaciones cántabres de Comillas y Santillana del Mar, la espectacular Cueva del Soplao y el Parque de la Naturaleza de Cabárceno, de visita obligada si se viaxa con neños!.