Español English Deutch Asturianu Français Nederlands Português

Propuestes

ideasparaempezar-150x150

El tiempu n’Asturies ye siempres una sorpresa, pero nesta web puede vese la evolución del mesmu y programar asina la nuesa xornada.

Les actividaes (inclusive con agua: qué sería d’Asturies ensin ella?), son innumberables, dende la práctica de deportes nel mediu natural (senderismo, canoes, caballos…), al turismu cultural, urbanu, gastronómicu o de comerciu, pasando pol golf (tenemos un campu de 9 fuexos a 10 minutos de casa).

Con neños ye recomendable esfrutar del ríu Seya en canoa o d’una intensa xornada nun Parque d’Aventura, visitar los dinusaurios del Muséu del Xurásicu en Colunga, los animales selvaxes del Parque de la Naturaleza de Cabárceno o esquizar la espectacular Cueva del Soplao na vecina Cantabria, conocer la fauna glacial y afayar el fósil d’un pequenu rinoceronte no fondero d’una cueva de Avín, xugar na sablera y percorrer el pueblu del “Doctor Mateo” (Llastres-Colunga), viaxar en tren por un auténticu Pobláu Mineru de principios del s.XX…

De xuru que lo van pasar en grande y pa ellos va ser una esperiencia inolvidable!.

agroturismodescubre-150x150

Dáti una vueltina pelos pueblos del valle o avérate a beber unes botelles de sidra acompañaes de dalgunos de los nuesos escepcionales y variaos quesos o una bona comida casera en cualesquier de los tradicionales chigres que vas atopar nel to camín. Y párate a parolar colos vecinos: va sosprendete comprobar la cantidá de coses qu’entá yes quién pa deprender y la riqueza y el valor d’unos códigos culturales bien vixentes.

Vas Comprobar, ente otres coses, que la tradicional ganadería sostenible ye equí una actividá viva y vas poder contemplar nel so mediu natural exemplares de races autóctones de ganáu, como les vaques asturianes de la montaña, la pita “pita pinta” o los míticos ponis asturcones.

Inclusive si te animes, vas poder participar en dalguna de les actividaes agraries o doméstiques tradicionales: fabricación de pan o mermelaes, trabayos de la güerta, manexu de ganáu, recoyer la herba, ablanes, castañes o mazanes… según la dómina del añu en que mos visites.

Esta zona centro-oriental d’Asturies ye tamién conocida como la Contorna de la Sidra: equí destaca’l cultivu de la mazana nes llamaes pumaraes, con una viva cultura sidrera venceyada a los tradiconales llagares; siendo Nava– a apenes unos minutos per carretera dende la nuesa casa-, la capital sidrera asturiana: en Nava allúgase’l interesante Muséu de la Sidra, tien la so see la noble y Bona Confrería de los Siceratores d’Asturies, bullen les iniciatives y cuerre l’amestao nel mundialmente conocíu chigre La Naveta, y tolos branos celébrase un gran festival de relevancia internacional alrodiu la nuesa bébora nacional.

ENLLACES:

Centru d’Interpretación de la Sierra’l Sueve (Gobiendes-Colunga)
Centro d’Interpretación sobre’l Gaiteru Lliberdón (Lliberdón-Colunga)
Muséu de la Sidra (Nava)
Ruta’l Quesu y la Sidra (Asiegu-Cabrales)
Aula del Miel (Alles-Peñamellera)
Cueva’l Quesu (Arenas-Cabrales)
Muséu Etnográficu del Oriente d’Asturias (Porrúa-Llanes)
Ecomuséu de Beleño (Ponga)
Muséu de la Madera (Casu)
Muséu de los Bolos (Panes)
Centru d’Artesanía (Poo-Llanes)
Muséu del Asturcón (Villaviciosa)
Molín del Ríu Tendi (Sevares-Piloña)
Horros d’Espinaréu (Piloña)
Fuente de Fresnosa (Piloña)
La Casa’l Tiempu (L’Infiestu-Piloña)
Muséu de la Escuela Rural d’Asturies (Viñón-Cabranes)
Muséu del Pueblu d’Asturies (Xixón)

viajaentren-150x150

¿Cuándo foi la última vegada que xubisti a un tren pa esfrutar d’un viaxe ensin prieses?. Si te averes a visitanos dende dalguna de les ciudaes que configuren la área metropolitana central d’Asturies (Uviéu, Xixón, Avilés…), puedes venir en tren nun percorríu verdaderamente privilexáu d’una hora aprosimao, travesando la cuenca central asturiana, el corazón de la so campiña. Tenemos estación de FEVE en Villamayor a 5 km. y l’estación de cercaníes en L’Infiestu nun queda llueñe de casa. Si quies, puedes programate un viaxe en tren y nós diremos esperate a la estación, ¡ensin compromisu dalgún!.

turismourbano-150x150

La casa atópase bien cerca los grandes núcleos urbanos de la área metropolitana central d’Asturies (apenes a 40 minutos per carretera d’Uviéu o Xixón). Y una bona alternativa a pasiar por un frondoso monte de fayes so l’agua ye dise a visitar la capital d’Asturies, Uviéu, pa esfrutar d’una escepcional ufierta comercial y cultural de la más alta calidá. Les más importantes xoyes del Arte Asturianu (la Cámara Santa de la Catedral, les ilesies del Monte Naranco o Santuyano, la Fonte la Foncalada…) concéntrense ellí; tamién ye obligada la visita al Muséu de Belles Artes d’Asturies o asistir y esfrutar de cualesquier de los numberosos conciertos de música que tengan llugar en dalgún de los ciclos programaos a lo llargo l’añu (sinfónica, de cámara, ópera, zarzuela, etc.)

Tamién la villa de Xixón ye una bona opción, col marineru barriu de Cimavilla, la sablera urbana de San Llorienzu o’l puertu deportivu, onde s’alluga l’Acuariu y el Centru de Talasoterapia. Ensin escaecer la villa d’Avilés, col so Centru Niemeyer y un perinteresante cascu históricu apenes conocíu.

turismocultural-150x150

Tolos cantiles de la contorna, dende Villaviciosa a Ribeseya, tienen gran interés xeolóxicu y paleontolóxicu, siendo escepcionalmente ricos n’ictites, buelgues fosilizaes de dinosaurios, destacando l’espectacular Muséu del Xurásicu d’Asturies en Colunga, d’obligada visita colos neños.

Tamos metanes una rexón na que s’alluguen dellos de los más importantes santuarios del Arte Paleolíticu francu-cantábricu (dende Tito Bustillo hasta Altamira, yá na vecina Cantabria) y a unos centenares de metros de la Cueva d’El Sidrón: colos sos casi 4 Km. de galeríes, ye la mayor cavidá asturiana escavada en calices non carboníferes, polo que tien un altu interés xeolóxicu y bioespeleolóxicu: la cueva alluga, amás, el más importante xacimientu d’Homo neanderthalensis de la Península Ibérica; l’Home de Neanderthal ye una especie d’homínidu perteneciente al mesmu xéneru al que pertenecemos los homes modernos (Homo sapiens), que surde n’Europa fai unos 230.000 años; la certidume de la so humanidá y el saber que dambes especies coesistimos miles d’años hasta la so estinción fai unos 30.000 años, faen del Home de Neanderthal ún de los más apasionantes enigmes pa la moderna paleoantropoloxía, que’l xacimientu de la Cueva d’El Sidrón ta yá contribuyendo a resolver. Por toes estes razones, la cueva y la so redolada foi declarada Monumentu Natural pola Alministración del Principáu.

La vieya cultura celta que los romanos atoparon al llegar a estes tierres fai 2.000 años perviviere hasta anguaño nel país, tresimitiéndose al traviés d’antigües dances y melodíes, mesmo del manexu los animales domésticos. Los nuesos ponis asturcones tán emparentaos xenéticamente colos ponis de les Islles Britániques y pol so carauterísticu pasu d’ambladura fueran especialmente envaloraos polos romanos, l’historiador Suetonio diz qu’ente los caballos preferíos del emperador Nerón había un asturcón. Tamién pervive la nuesa vieya cultura atlántica nes palabres, los topónimos y vocablos asturianos de raigón celta; nos tradicionales detalles decorativos qu’entá güei adornen el típicu calzáu asturianu de madera (madreñes), les construiciones y muebles tradicionales (horros, cases, arcones…); nes lleendes y los mitos, ya en ciertos vezos y rituales paganos venceyaos a nueches máxiques como la de San Xuan. A pocos metros de la nuestra casa, nel pórticu la ilesia de Samartín de Borines (del s.XVI, anque yá mentada nuna donación del Rei ástur Ramiro II, nel s.X), a la solombra de dos magníficos texos delles vegaes centenarios, esiste una inscripción funeraria de la cla ástur de los Ablaidacos. El texu (Taxus baccata) sigui siendo güei como entós l’árbol sagráu d’Asturies por escelencia y nel Sueve entá podemos contemplar el mayor monte de texos de toa Europa. Los ablaidacos fueren una cla o gens perteneciente a la tribu de los Lluggones, los ástures tresmontanos qu’habitaren estes tierres; el so etnónimu podría desplicase a partir de términu célticu galés blaid, que significa “llobu”. Nel nuesu valle alcontráronse restos d’importantes poblaos célticos fortificaos (castros d’Argandenes, Antrialgu, Viyao), y tamién pervalibles xoyes d’oru, obres maestres de la orfebrería ástur, como la nomada diadema de Moñes.

El casi desconocíu arte románico asturianu, tapecíu pol rellumante arte del Reinu d’Asturies, destaca especialmente na comarca, con importantes muestres na mesma Villamayor (Piloña) o nel vecín Conceyu de Villaviciosa. Merez la pena afayar y esfrutar con aselu d’estes pequeñes xoyes, espardíes pela redolada típicamente rural del corazón de la campiña.

La contorna destaca coles mesmes pol gran númberu de casones y palacios rurales, como la Torre l’Omedal (Miyares), el Placiu de Cutre (La Goleta), el Palaciu de Rubianes (Cerecea), o’l Palaciu Sorribes (Sevares), residencia en munchos casos d’emigrantes retornaos d’América a finales del XIX y principios del XX (los llamaos indianos), que nel so interior atesoraben fantástiques biblioteques, cuyos exemplares llegaben per mar dende Gran Bretaña y Francia, refugando la censura española, y nutriéndose d’elles toa una xeneración de grandes ilustraos asturianos. Esiste tamién una estela llatina nel interior de la ilesia de Samartín de Borines que fai referencia a les propiedaes salutíferes de les agües sulfuroses y carbonataes qu’equí surden. El Balneariu de Borines, fuera ún de los más importantes centros de salú y recréu de tol Cantábricu a finales del sieglu XIX y a elli allegaren importantes personaxes de la vida político y social de la dómina.

actividadesdeportivas-150x150

La nuesa casa ta allugada nel Paisaxe Protexíu de la Sierra del Sueve, na cuenca del ríu Seya, arrodiada de les impresionantes bosques y montañes de los Parques Naturales de los Picos d’Europa, Ponga y Redes y mui cerca les ríes, sableres y cantiles de la mariña oriental asturiana.

Na redolada ye posible practicar infinidá d’actividaes d’aire llibre, ente les que te proponemos:

– Descensu del Seya en canoa, Rutes a caballu, Parque d’Aventura…

– Itinerarios culturales, botánicos, senderismu, trekking, alpinismu, esguilada, espeleoloxía o descensu de cañones cola compañía de guíes titulaos.

– Fotografía de naturaleza y subacuática.

– Pesca deportiva nos salmoneros ríos Seya o Piloña.

– Golf nel campu del Palaciu de Rubianes.

– Etc.